യു.ജി.സി: ആരോഗ്യ-അനുബന്ധ കോഴ്‌സുകൾക്ക് ODL, ഓൺലൈൻ മോഡിൽ വിലക്ക്
സർവകലാശാലാ ഗ്രാന്റ്സ് കമ്മീഷൻ (UGC) ആരോഗ്യവും അനുബന്ധ വിഷയങ്ങളും ഉൾപ്പെട്ട പ്രോഗ്രാമുകൾ ഇനി മുതൽ ഓപ്പൺ ആൻഡ് ഡിസ്റ്റൻസ് ലേണിംഗ് (ODL), ഓൺലൈൻ മോഡുകളിൽ നടത്തരുതെന്ന് നിർദ്ദേശം നൽകി. 2025 ജൂലൈ-ഓഗസ്റ്റ് മാസങ്ങളിൽ ആരംഭിക്കുന്ന പുതിയ അക്കാദമിക് വർഷം മുതൽ നിരോധനം പ്രാബല്യത്തിൽ വരും. 592-ാമത് യു.ജി.സി യോഗത്തിൽ (ജൂലൈ 23, 2025) എടുത്ത തീരുമാനമാണ് ഇത്. 2025 ഏപ്രിൽ 22-ന് നടന്ന 24-ാമത് Distance Education Bureau Working Group യോഗത്തിന്റെ ശുപാർശകളാണ് തീരുമാനം എടുക്കാൻ ആധാരമായത്.
സൈക്കോളജി, മൈക്രോബയോളജി, ഫുഡ് ആൻഡ് ന്യൂട്രിഷൻ സയൻസ്, ബയോടെക്നോളജി, ക്ലിനിക്കൽ ന്യൂട്രിഷൻ ആൻഡ് ഡയറ്ററ്റിക്സ് എന്നിവയാണ് നിരോധന വിധേയമായ പ്രധാന വിഷയങ്ങൾ. ബഹുവിഷയ സ്പെഷ്യലൈസേഷനുകൾ നൽകുന്ന പ്രോഗ്രാമുകളിൽ (ഉദാ: ബിരുദ കോഴ്‌സിലെ ഇംഗ്ലീഷ്, ഹിന്ദി, പൊളിറ്റിക്കൽ സയൻസ്, സോസിയോളജി, വിമൻസ് സ്റ്റഡീസ് തുടങ്ങിയവ) ആരോഗ്യവുമായി ബന്ധപ്പെട്ടിരിക്കുന്ന സ്പെഷ്യലൈസേഷനുകൾ മാത്രമേ പിൻവലിക്കുകയുള്ളു. മറ്റ് വിഷയങ്ങൾക്ക് വിലക്ക് ബാധകമല്ല. ഇതിനകം അംഗീകാരം ലഭിച്ച സ്ഥാപനങ്ങളുടെ അനുമതിയും യു.ജി.സി പിൻവലിക്കുമെന്ന് അറിയിച്ചു.
